|
Akureyrarkirkja.
Akureyrarkirkja var vígð í nóvember 1940 og hefur verið
stolt akureyringa og nærsveitunga æ síðan. Kirkjan er mikið
notuð og vel sótt og þykir með glæsilegustu kirkjum
landsins.
Arkitekt
Akureyrarkirkju var Guðjón Samúelsson (1887-1950).
Hugmyndir
um endurnýjun hljóðkerfis Akureyrarkirkju komu fram árið
2005, þá hafði nokkuð lengi verið kvartað undan óskýru tali
og rifnum tóni. Þörf var á fleiri þráðlausum hljóðnemum og
æskilegt að kirkjuvörður gæti stýrt kerfinu úr aðstöðu
kirkjuvarðar í anddyri.
Við hjá
Tónabúðinni höfum skoðað þessi mál nokkuð lengi, og
þegar falast var eftir tilboði í nýtt hljóðkerfi á vordögum
2008 sendum við teikningar af húsinu til Fohhn í
Þýskalandi þar sem málin á húsinu voru sett inn í
hermiforrit og reiknað út hvernig hátalarar myndu henta best
og hvaða staðsetning myndi skila bestum árangri.
Með þau
gögn og okkar miklu reynslu af uppsetningu hljóðkerfa að
vopni, unnum við tilboð sem sóknarnefnd samþykkti og óskaði
eftir að Tónabúðin myndi selja og setja upp nýtt
hljóðkerfi í Akureyrarkirkju.
Verkið var
unnið í september 2008.
Við
uppsetninguna nutum við aðstoðar rafvirkja frá
Ljósgjafanum og þá sérstaklega Reynis Vatlýssonar,
sem hefur séð um raflagnir í kirkjunni síðustu 30 ár eða svo.
Þekking
hans á lögnum og lagnaleiðum í kirkjunni skipti sköpum og
sáu rafvirkjar Ljósgjafans um að leggja allar hátalarasnúrur
og aðrar lagnir þannig að sem minnst bæri á þeim. Tókst það
verk mjög vel.
Hljóðkerfið
í kirkjunni samanstendur af 12 hátölurum, 10 magnararásum, 5
þráðlausum hljóðnemum, 2 föstum hljóðnemum, hljóðblandara og
DSP hljóðstýringu. DSP hljóðstýringin sér um að deila
hljóðinu í hátalarana og stilla styrk, tón og seinkun á
hljóði í hvern hátalara. Einnig er stýripanell í andyri
tengdur við hljóðstýringuna sem gerir kirkjuverði kleyft að
hækka og lækka í kerfinu eftir þörfum.
Hátalararnir eru frá
Fohhn, úr
Linea seríunni. Þessir hátalarar eru sérhannaðir til að
virka sem best í rými sem hafa langan óm-tíma, svo sem
kirkjur, tónleikasalir, ráðstefnusalir.
Allir
hljóðnemar og tengdur búnaður er frá
Shure. Við hljóðkerfið eru tengdir fimm þráðlausir
hljóðnemar, einn til að halda á eða setja á stand, og fjórir
með
WCE6 höfuðspöng af bestu gerð sem tryggir bestu
hugsanlegu hljómgæði á tali.
Hljóðblandari og kraftmagnarar eru frá
Ecler á Spáni. Ecler sérhæfir sig einmitt í
tækjum fyrir fastsett hljóðkerfi (installation) og þykir
mjög framarlega á því sviði.
Hljóðstýringin og stýripanellinn eru frá
Fohhn líkt og hátalararnir. Með nákvæmum stillingum
tókst okkur að stilla kerfið þannig að hvergi er meiri
styrksmunur en 2,5dB á milli sæta, þannig að hvergi er of
mikill hávaði og hvergi heyrist of lítið.
Við
hljóðkerfið tengjast minni hljóðkerfi í kapellu og
safnaðarheimili þannig að hægt er að hlusta á athafnir úr
kirkjunni á báðum stöðum.
Hljóðkerfið
hefur núna verið í notkun í nokkrar vikur og hefur reynst
frábærlega. Einfalt í notkun og hljómurinn jafn og góður.
Við óskum
prestum og öðrum starfsmönnum kirkjunnar, sóknarnefnd og
akureyringum öllum til hamingju með nýja hljóðkerfið í
Akureyrarkirkju.
Starfsmenn Tónabúðarinnar.
|
